Khizan k Phool (Flowers of Fall)

.

Poem:

Chand khizaan k phool jamaa kar aaya hun,
Mein chaand se dhuul judaa kar aaya hun.
Woh shajr jis par seecha tha humne ghonsla.
Mein us shajr se ik naam mita kar aaya hun.

Ik pahaar dil mein hai aur ik mere samnay…
Mei zameen chuu kar tujay bada kar aaya hun.
Band kothi se yaad kar le aaya bhula saman,
Mein kaam do logon ka akela kar aaya hun.

Jatay huay jo bhar diya tha na tunay…
Woh kooraa daan adhura kar aaya hun.
Chamka aaya hun sheesha gar tu dekhe.
Hun nikama par kaam aala kar aaya hun.

Kahan chhuppi hai konsi chaabi ye
Tere chokidar ko bata kar aaya hun…
Koi ghalti se bhi na jaankhle tere atiit mein,
Tasveer k peechay tasveer chhuppa kar aaya hun.

Awaaz uth gayi zara meri bhi shor mein,
Thoda deir se sahi par baja aaya hun…
Badalwa liya hai khud ka mustaqil pata,
Qasidon ko barri-o-shubba kar aaya hun.

Dekha nahi jaata mujse tuuti emaarat ka haal.
Paas k gaun se Hakeem ko bula kar aaya hun.
Khuli reh gayi thi shayad yadon ki ek almaari.
Aatay huay usay mein kundi laga kar aaya hun.

Ab jo beth gaya to beth gaya daman-e-koh mein.
Sohani, mein isbar sab kashtiya jala kar aaya hun.

— Dedicated to the lovers who (for whatever god-forsaken reason) moved apart.

Credits: Base phrase of the poem: Khiza k Phool, provided by Madam Sarah Awan.

• ghazal
• longing
• nostalgia
• past
• poetry
• Urdu poetry
• yearning