Poem:
Tum baazi lagate ho, jeet bhi jate ho.
Haray huay dil ko chhor bhi jate ho…
Haar mei dete ho tum jeet ki mehr,
Kese pechay hein jo tum ladate ho?
Lete nahi ho tum chehre par koi shikn,
Khelte ho yun jese parakhne aate ho.
Kartay ho rabt maghrib ka aasmaan dekh,
Jatatay ho yun goya kuch nahi chahte ho.
Ghiratay ho parda chehra bhi chhuppate ho,
Ik baat batao, itratay ho ya sharmatay ho?
Baaz aanay se gar dartay ho itna,
To kyun apnay paas bulatay ho?
Kia kharch-e-kalisaa kia daam-e-jaam?
Mujay to wahi aankhon se pilatay ho.
Nahi aati maut us paani se jis mein,
Ik bund tum apne ishq ki milate ho.
Jhankte ho girhebaan mei mehrbaan k,
Ya bus usay sirf sar par charhtay ho?
Mere Udu itra rahein hein mehfil mein,
Lagta hai unehin bhi tum sarhate ho.
Puuchte ho tum kabhi apne madah se
“Kia kismat se, kia chori se pate ho?”
Roktay nahi tum masawat ki lau ko,
Khud bhi jaltay ho, auron ko jalatay ho.
Thehrte nahi, goya sirf chakhne aate ho?
Mehfil mein shayad kuch kha kar aate ho.
Nahi khaya phal kisi shajr ka phir bhi…
Koi qasr hai jannat se bahr nikalte ho?
Mei soyaa nahi hun kahi dino se, batao…
Woh konsi loriyan hein jo tum sunate ho?
Mei to nahi hota yahan, jab tum nahi hote.
Kya hota hai wahan jb tum muskurate ho?
Ye baazi kesi mei jeetu to mei tumhari,
Gar k tum jeeto to tum apna lete ho.
Chaah to hamari bhi hai jeetne ki Sohani,
Par hote hi khel tum asuul badal-jate ho.
— Dedicated to the lover offering his love to the beloved while questioning the beloved’s sincerity…
Credits: Base phrase of the poem, provided by Madam Sarah Awan.
Serenades of a dreamer... 